រឿង៨យ៉ាងដែលនឹងកើតឡើង ក្រោយពេលអ្នកឈប់ប្រើថ្នាំពន្យារកំណើតភ្លាមៗ

2018-01-21 05:42:51
ចំនួនមតិ 0 | ចំនួនចែករំលែក 0

ថ្នាំពន្យារកំណើតគឺជាជម្រើសមួយ នៃការការពារកុំឲ្យមានផ្ទៃពោះសម្រាប់ស្ត្រី។ ជាទូទៅថ្នាំប្រភេទនេះ គឺមានសុវត្ថិភាព ប្រសិទ្ធភាព តម្លៃសមរម្យ និងងាយស្រួលក្នុងការស្វែងរកទិញណាស់។ ប៉ុន្តែប្រសិនបើអ្នកបានប្រើប្រាស់វាមួយរយៈ ហើយក៏ស្រាប់តែប្ដូរចិត្តចង់ឈប់ប្រើវិញ ដោយសារមូលហេតុណាមួយ នោះអ្នកប្រាកដជាជួបប្រទះបញ្ហាទាំង៨យ៉ាងនេះមិនខាន៖

១. អ្នកអាចមានផ្ទៃពោះ

ដំណើរនៃការបញ្ចេញអូវុល នឹងចាប់ផ្ដើមបន្ទាប់ពីមួយសប្ដាហ៍ក្រោយការឈប់ប្រើថ្នាំ។ ឧកាសនៃការមានផ្ទៃពោះខ្ពស់ ប្រសិនអ្នកមិនមានការប្រុងប្រយ័ត្ន។ ដូច្នេះបើអ្នកចង់បន្តការពន្យារកំណើតនេះតទៅទៀត អ្នកត្រូវចាប់ផ្ដើមប្រើវាបន្តក្នុងរយៈពេលមួយសប្ដាហ៍ក្រោយការឈប់នេះដូចគ្នា។

២. បម្រែបម្រួលនៃអារម្មណ៍

វាអាចខុសគ្នាទៅតាមបុគ្គលម្នាក់ៗ។ សម្រាប់ស្ត្រីដែលពីមុនតែងតែជួបបម្រែបម្រួលអារម្មណ៍ខ្លាំងមុនថ្ងៃមករដូវ អាចនឹងប្រឈមជាមួយបញ្ហានេះជាថ្មីម្ដងទៀត។ អ្នកខ្លះក៏មិនមានអ្វីប្រែប្រួលគួរឲ្យកត់សម្គាល់។ ប៉ុន្តែសម្រាប់ស្ត្រីដែលទទួលឥទ្ធិពលអាក្រក់ដូចជា អាការៈមួម៉ៅ ធុញថប់ មិនមានចំណង់ផ្លូវភេទ កំឡុងពេលប្រើថ្នាំ អាចនឹងមានអារម្មណ៍ល្អប្រសើរវិញបន្ទាប់ពីការផ្អាកនេះ។

៣. ការឈឺចាប់ និងធ្លាក់ឈាមច្រើនពេលមករដូវ

នៅពេលដែលអ្នកមករដូវជាថ្មី អ្នកនឹងប្រឈមជាមួយការឈឺចាប់ ក៏ដូចជាការធ្លាក់ឈាមច្រើនខុសពីធម្មតា។ វាក៏អាស្រ័យទៅតាមបុគ្គលម្នាក់ៗដូចគ្នា។ ប្រសិនពីមុនអ្នកតែងតែមានបញ្ហា កំឡុងពេលមករដូវ ជៀសមិនផុតបញ្ហាចាស់ៗទាំងនោះនឹងត្រឡប់មករកអ្នកវិញដដែល។

៤. ការជ្រុះសក់

ការឈប់ប្រើថ្នាំ បានបន្ថយការលូតលាស់នៃសក់ថ្មី។ ដូច្នេះអ្នកនឹងប្រឈមជាមួយការជ្រុះសក់ ដែលជាឥទ្ធិពលប្រូសេស្តេរ៉ូន របស់ថ្នាំពន្យារកំណើត។

៥. បម្រែបម្រួលសុដន់

បញ្ហានេះអាស្រ័យទៅកម្រិតប្រតិកម្មរបស់បុគ្គលម្នាក់ៗចំពោះបម្រែបម្រួលអ័រម៉ូនកំឡុងពេលប្រើ និងប្រភេទថ្នាំផងដែរ។ អ្នកខ្លះអាចប្រឈមជាមួយការឈឺចាប់ ដោយសារតែសុដន់ឡើងតឹង ហើយអ្នកខ្លះទៀតបែរជាធូរស្រាលក្រោយពេលឈប់ប្រើទៅវិញ។

៦. ចំណង់ផ្លូវភេទកើនឡើង

នេះជាដំណឹងល្អ ព្រោះអ្នកនឹងទទួលបានសុភមង្គលផ្លូវភេទជាថ្មី។ ចំណង់ផ្លូវភេទថយចុះដោយសារឥទ្ធិពលថ្នាំពន្យារកំណើតបានបន្ថយកម្រិតអ័រម៉ូនតេស្តូស្តេរ៉ូននៅក្នុងចរន្តឈាម។ ដូច្នេះអ្វីៗនឹងត្រឡប់ទៅរកសភាពដើមវិញក្រោយការឈប់ប្រើវា។

៧. កើតមុន

ការធ្លាក់ចុះនៃអ័រម៉ូនតេស្តូស្តេរ៉ូន បណ្ដាលឲ្យការកើតមុននៅលើស្បែកវិវត្តទៅរកភាពល្អប្រសើរ។ ដូច្នេះពេលអ្នកឈប់ប្រើ មុនទាំងនោះនឹងត្រឡប់មកវិញ។ ផ្ទុយទៅវិញ ចំពោះស្ត្រីដែលកំឡុងពេលប្រើថ្នាំ ជួបបញ្ហាស្បែក លទ្ធផលពេលឈប់ប្រើប្រាកដជាផ្ទុយគ្នាមិនខាន។

៨. ការធ្លាក់ចុះនៃជាតិដែក

ថ្នាំពន្យារកំណើត មានផ្ទុកជាតិដែក។ ដូច្នេះប្រសិនបើពេលឈប់ប្រើ អ្នកធ្លាក់ឈាមច្រើនពេលមករដូវ នោះវាជាសញ្ញានៃកង្វះជាតិដែកហើយ។ ដើម្បីដោះស្រាយបញ្ហានេះ អ្នកត្រូវងាកមកយកចិត្តទុកដាក់លើរបបអាហារប្រចាំថ្ងៃ ដើម្បីបង្កើនបរិមាណជាតិដែកនោះឡើងវិញ៕