ខ្លួនជាស្រីមករស់នៅភ្នំពេញតែឯង គួរតែថែខ្លួនតាមវិធីនេះដើម្បីចៀសផុតពីគ្រោះថ្នាក់

2018-01-21 02:37:59
ចំនួនមតិ 0 | ចំនួនចែករំលែក 0

សម្រាប់អ្នកដែលមានគ្នា ឬមានសាច់ញាតិស្រាប់ប្រហែលជាមិនសូវមានការលំបាកនោះទេ ព្រោះយ៉ាងហោចណាស់ក៏មានគ្នាចាំមើលចាំជួយទៅវិញទៅមកដែរ។ ដោយឡែកសម្រាប់មនុស្សស្រីមួយចំនួនដែលគាត់ត្រូវរស់នៅតែឯងប្រាកដជាមានការលំបាកច្រើនទាំងការដើរទៅណាមកណា និងសុវត្ថិភាពពេលយប់ព្រលប់តែម្ដង។ ថ្ងៃនេះ កញ្ញា ក៏ចង់ចែករំលែកគន្លឹះខ្លះៗដល់នារីៗក្នុងការថែរក្សាខ្លួនក្នុងពេលរស់នៅម្នាក់ឯង ធ្វើយ៉ាងណាកុំឲ្យមានរឿងរ៉ាវអាក្រក់កើតឡើង ៖

១. ជ្រើសរើសផ្ទះជួលឲ្យមានសុវត្ថិភាពបំផុត

ជាដំបូងអ្នកគួរតែដើររកផ្ទះជួល ឬបន្ទប់ជួលណាដែលមានសុវត្ថិភាពខ្ពស់ ក្នុងការថែរក្សាទ្រព្យសម្បត្តិ ឬរបស់របរមានតម្លៃពេលអ្នកមិននៅ។ គួរតែរកផ្ទះណាដែលមានការយាមកាម មើលការខុសត្រូវ មានកាមេរ៉ាសុវត្ថិភាព កន្លែងដាក់ម៉ូតូបានត្រឹមត្រូវជាដើម ហើយត្រូវចៀសវាងបន្ទប់ជួលណាដែលមានជណ្ដើរក្រៅផ្ទះ។

រូបតំណាង

**២. រកកន្លែងដែលអ៊ូអរ តែកុំឲ្យមានក្មេងបែកថ្នាំ ឬពួកពាល**

គួរតែរកកន្លែងណាដែលអ៊ូអរបន្តិចព្រោះទោះពេលយប់ក៏នៅមានមនុស្សច្រើន ដូច្នេះពេលអ្នកមកផ្ទះយប់ៗក៏មិនសូវជាខ្លាច ឬមានបញ្ហាដែរ។ អ្វីដែលត្រូវចៀសនោះគឺន្លែងដែលមានក្មេងបែកថ្នាំ ឬពាលច្រើនព្រោះពួកគេអាចបង្កគ្រោះថ្នាក់ដល់អ្នកថាមិនត្រូវ ព្រោះពេលពួកគេគ្មានលុយពួកគេអាចចេញលួច ឬអាចធ្វើបាបអ្នកនៅពេលពួកគេចាប់អារម្មណ៍លើអ្នកក៏ថាបាន។

៣. បើមានកម្មវិធីដល់យប់ជ្រៅគួរតែរកអ្នកណាជូនមកផ្ទះ

ពេលខ្លះទោះកន្លែងដែលអ្នករស់នៅអ៊ូអរមែនតែតាមផ្លូវដែលអ្នកជិះមកមិនប្រាកដថាល្អនោះទេ ដូច្នេះបើអ្នកមានការរវល់នៅដល់យប់នោះគួរតែមានមិត្តភក្តិ ឬអ្នកណាដែលអាចជូនមកបាន។ រឿងខ្លះយើងមើលមិនឃើញនោះទេ បែបនេះហើយគួរតែការពារទើបជាការប្រសើរ។

៤. មានថ្នាំបង្ការខ្លះនៅក្នុងផ្ទះ

ដឹងស្រាប់ហើយនៅម្នាក់ឯងទោះឈឺ ទោះជាក៏គ្មានអ្នកណាអាចជួយយើងបានភ្លាមៗដែរដូច្នេះត្រូវតែមានថ្នាំសាគួរខ្លះទើបល្អ ដូចជាថ្នាំក្ដៅខ្លួន ផ្ដាសាយ រាគរូសជាដើម។ មួយវិញទៀតត្រូវមាន ប្រេងកូឡា សំឡី អាកុល ឬបង់បិទរបួសជាដើម ដើម្បីបង្ការពេលមានបញ្ហាអីកើតឡើង។

រូបតំណាង

៥. គេងពេលយប់ត្រូវចាក់សោរ ចាក់គន្លឹះឲ្យបានត្រឹមត្រូវ

ពេលយប់អ្នកត្រូវប្រាកដថាបិទទ្វារ បិទបង្អូចដាក់គន្លឹះ ចាក់សោរឲ្យបានត្រឹមត្រូវចៀសវាងមានជនមិនល្អចង់ចូលលួច ឬចង់ធ្វើបាបជាដើម។ ម្យ៉ាងទៀតបើមានអ្នកណាគោះទ្វារ ឬស្រែកហៅ បើអ្នកមិនស្គាល់ទេកុំបើកឲ្យសោះ ព្រោះអាចជាជនខិលខូចបន្លំចូលក៏ថាបាន។

៦. កុំសូវឲ្យអ្នកក្រៅមកលេងផ្ទះពេក

ជាការល្អកុំសូវយកអ្នកក្រៅមកលេងបន្ទប់អ្នកអី ព្រោះពេលខ្លះអាចឲ្យម្ចាស់ផ្ទះពិបាកពេលមានអ្នកក្រៅមករកអ្នកហើយប្រាប់ថាជាមិត្តអ្នកជាដើម។ ម្យ៉ាងទៀតបើទើបស្គាល់គ្នាទេកុំបណ្ដោយឲ្យគេមកស្គាល់ផ្ទះអី ព្រោះពេលខ្លះយើងមើលចិត្តមនុស្សមិនឃើញទេ ដូច្នេះគួរប្រយ័ត្នប្រយែងទើបល្អ។

៧. ចេះប្រើ Google Map

ការដើរហើរម្នាក់ឯងពេលខ្លះរាងពិបាកបើអ្នកមិនសូវស្គាល់ផ្លូវ ឬកន្លែងដែលអ្នកត្រូវទៅ ដូច្នេះ Google Map អាចជួយសម្រួលដល់ការធ្វើដំណើរអ្នកបាន។ ព្រោះអ្នកគ្រាន់តែ Search រកកន្លែងដែលអ្នកចង់ទៅ នោះវានឹងចេញទិសដៅ និងផ្លូវដែលអ្នកត្រូវទៅ ហើយអ្នកគ្រាន់តែជិះតាមទិសដៅដែលវាបានប្រាប់ជាការស្រេចដោយមិនបាច់ Call សួរផ្លូវគេនោះទេ។

នៅម្នាក់ឯងត្រូវតែប្រយ័ត្នប្រយែងឲ្យបានខ្ពស់ ព្រោះពេលមានរឿងអីក៏គ្មានអ្នកណាអាចមកជួយយើងទាន់ពេលនោះដែរ ម្យ៉ាងទៀតជាស្រីផងពិតជាមានហានិភ័យខ្ពស់ជាមនុស្សប្រុសណាស់ ដូច្នេះត្រូវចេះការពារ និងមើលថែខ្លួនឯងឲ្យបានល្អ៕

ចុចអាន៖វាជាការប្រសើរណាស់បើមនុស្សយើងអាចរស់នៅដោយមិនច្រណែនឈ្នានីសគ្នា

អត្ថបទ៖ ផេង ផលធិតា