សោកស្ដាយជំនួសគូស្នេហ៍បែកគ្នា ដែលមិនបានអានអត្ថបទនេះ
- 2018-01-16 05:00:47
- ចំនួនមតិ 0 | ចំនួនចែករំលែក 0
សោកស្ដាយជំនួសគូស្នេហ៍បែកគ្នា ដែលមិនបានអានអត្ថបទនេះ
នៅពេលឃើញគូស្នេហ៍ដែលស្រឡាញ់គ្នាខ្លាំង ហើយត្រូវបែកគ្នា អ្នកក្រៅឯណេះក៏ទ្រាំមិនស្ដាយមិនបាន។ គិតទៅមើល ទម្រាំបានជួបមនុស្សដែលគេស្រឡាញ់យើង ហើយយើងក៏ស្រឡាញ់គេ វាមិនមែនជារឿងស្រួលសោះឡើយ តែមិនគួរណាមកបែកគ្នាងាយៗដោយសារតែ “ភាពមានៈ” ចង់ឈ្នះរៀងខ្លួន។ មិនចង់ឃើញអ្នកណាត្រូវបែកគ្នាដោយសារហេតុផលនេះទៀតឡើយ ដូច្នេះថ្ងៃនេះ កញ្ញា សូមដកស្រង់រឿងនិទានអប់រំចិត្តពីសៀវភៅបរទេសមួយ មកប្រែសម្រួលសម្រាប់ប្រិយមិត្តដែលកំពុងមានរឿងអន់ចិត្តជាមួយគូស្នេហ៍នៅពេលនេះ។
មានស្វាមីភរិយាមួយគូទើបតែរៀបការមិនបានប៉ុន្មាន ក្រោយមកប្រទេសក៏កើតសង្គ្រាម។ ស្វាមីត្រូវកេណ្ឌទៅធ្វើទាហាន ដូច្នេះក៏ត្រូវបង្ខំចិត្តចាកចោលប្រពន្ធជាទីស្រឡាញ់។ កន្លងផុតទៅ ៤ឆ្នាំ ភរិយាក៏បានផ្ដល់កំណើតឲ្យកូនប្រុសម្នាក់អាយុបាន ៤ខួប។ នៅពេលបានដឹងដំណឹងថាប្ដីរបស់ខ្លួនត្រលប់ពីសង្គ្រាមវិញ ប្រពន្ធក៏ដឹកដៃកូនប្រុសទៅទទួលឪពុកភ្លាម។ នៅពេលអ្នកទាំងពីរបានជួបគ្នានៅផ្សារ ម្នាក់ៗក៏ស្ទុះឱបគ្នាដោយអារម្មណ៍រំភើបរីករាយ។ នាងជាម្ដាយក៏ប្រាប់ឲ្យកូនប្រុសឱបឪពុក ប៉ុន្តែដោយមិនធ្លាប់ឃើញមុខគ្នាពីមុន កូនប្រុសក៏ឈរធ្វើមុខចម្លែកៗ។ ស្ត្រីជាម្ដាយគិតថាមិនអីទេ បន្តិចទៀតឪពុកនិងកូននឹងត្រូវគ្នាឯង ដូច្នេះក៏បណ្ដោយឲ្យអ្នកទាំងពីរនៅជាមួយគ្នា ចំណែកនាងក៏ចូលទៅទិញអីវ៉ាន់នៅក្នុងផ្សារ ដោយគិតថាល្ងាចនេះនឹងធ្វើម្ហូបអាហារដែលមានឱជារសឆ្ងាញ់បំផុតដើម្បីអបអរការវិលត្រលប់របស់ស្វាមី។
ចន្លោះពេលដែលប្រពន្ធចូលទិញអីវ៉ាន់ ប្ដីក៏ទាញខ្លួនកូនមកឱប ហើយប្រាប់កូនឲ្យហៅខ្លួនឯងថា ពុក។ បុរសជាឪពុកខំប្រឹងនិយាយលួងលោមកូនយ៉ាងយូរ រហូតកូនតូចមានអារម្មណ៍ធុញទ្រាន់ ទើបរលាស់ខ្លួនចេញមក ហើយនិយាយថា "អ៊ំឯងមិនមែនពុកខ្ញុំទេ ពុកខ្ញុំចូលចិត្តមករកម៉ែ និងខ្ញុំតែពេលយប់ទេ ពេលម៉ែអង្គុយ ពុកក៏អង្គុយ ពេលម៉ែសម្រាន្ត ពុកក៏សម្រាន្តដែរ”។ បានឮកូននិយាយបែបនេះ គេទន់ខ្លួន ស្លេកមុខ កំហឹងក្រេវក្រោធក៏ចូលពេញខួរក្បាល។ គេមិនព្រមនិយាយជាមួយប្រពន្ធទៀតឡើយ មិនថានាងព្យាយាមរកចង្វាក់ បបួលនិយាយយ៉ាងណាក៏ដោយ។ គេតែងនិយាយថា ស្នេហាគឺជាអារម្មណ៍បញ្ច្រាសគ្នាជាមួយនឹងការស្អប់ ហើយបើស្នេហាមិនបានសុខ ក្ដីទុក្ខនឹងឡើងមកតាមក្រោយ។ ពេលស្នេហាមិនសមបំណង អារម្មណ៍ស្រឡាញ់នឹងក្លាយជាស្អប់ ក្ដីទុក្ខនឹងចូលមករុកកួនដូចស្រមោលអន្ទោលតាមប្រាណ។ នាងជាប្រពន្ធអត់ធន់នឹងភាពសោះអង្គើយរបស់ស្វាមីបាន ៣ថ្ងៃ ក្រោយមកទ្រាំលែងបាន នាងក៏សម្រេចចិត្តលោតទឹកសម្លាប់ខ្លួន។
នៅក្នុងពិធីបុណ្យសពនោះ បុរសប្ដីក៏បានអុជចង្កៀងដាក់នៅក្បែរមឈូសសពប្រពន្ធ។ នៅពេលគេក្រោកដើរទៅមក កូនប្រុសក៏ស្រែកយំខ្លាំងៗនិងចង្អុលទៅកាន់ស្រមោលរបស់ឪពុកលើជញ្ជាំង និយាយថា “នុះ! ពុកខ្ញុំមកហើយ ពុកចូលចិត្តមកតែពេលយប់ ពេលម៉ែអង្គុយ ពុកក៏អង្គុយ ពេលម៉ែសម្រាន្ត ពុកក៏សម្រាន្ត”។ បុរសជាឪពុកងាកមកមើល ពុកដែលកូននិយាយ ក៏ឃើញថាមានតែស្រមោលរបស់ខ្លួនឯងប៉ុណ្ណោះ។ មកដល់វិនាទីនេះ ទើបគេបានយល់ថា ប្រពន្ធស្រឡាញ់ និងស្មោះស្ម័គ្រចំពោះគេខ្លាំងប៉ុណ្ណា ដោយសុខចិត្តប្រឌិតថាស្រមោលខ្លួនឯងគឺជាឪពុករបស់កូន រហូតធ្វើឲ្យកូនតូចយល់ច្រឡំ។
ព្រឹកថ្ងៃបន្ទាប់ អ្នកភូមិក៏ប្រទះសាកសពនាយទាហាននៅមាត់ទឹក កន្លែងតែមួយជាមួយកន្លែងដែលភរិយារបស់គេសម្លាប់ខ្លួន ដោយទុកឲ្យកូនត្រូវក្លាយជាកូនកំព្រាគួរឲ្យអាណិត។ អនិច្ចា បើថ្ងៃនោះគេមិនចិត្តរឹងរូសមានៈគិតម្នាក់ឯងថាប្រពន្ធមានសហាយ ហើយព្រមហើបមាត់សួរប្រពន្ធថា ឪពុករបស់កូនម្នាក់នោះជានរណា ឬបើនាងមិនប្រកាន់ចិត្តមានៈខ្លាំង ហើយទុកពេលស្វែងរកមូលហេតុនៃភាពប្រែប្រួលរបស់ប្ដី ហើយងាកមុខនិយាយគ្នាដោយប្រើហេតុផល សោកនាដកម្មទាំងនេះ ក៏គង់មិនកើតឡើង។
នៅពេលដាក់ចិត្តដាក់កាយថាស្រឡាញ់គ្នាហើយ សូមកុំឲ្យភាពមានៈមកបំផ្លាញក្ដីស្រឡាញ់របស់ខ្លួនឲ្យសោះ។ សូមគិតដល់រឿងល្អៗ ថ្ងៃល្អៗ ព្យាយាមនិយាយគ្នាតាមសម្រួលដោយប្រើហេតុផលនៅខណៈដែលកំពុងខឹងគ្នា មុននឹងគ្រប់យ៉ាងក្លាយជាហួសពេល ដូចជារឿងនិទានខាងលើនេះ ៕
ចុចអាន៖
ប្ដីថាប្រពន្ធនៅតែផ្ទះគ្មានធ្វើស្អីទេ តែថ្ងៃមួយចង់ខ្យល់ចាប់ ព្រោះប្រពន្ធ...