ស្រឡាញ់គ្នាស្ទើរលេបក៏ដោយ បើមនុស្សមិនល្អ ក៏គង់នៅជាមួយគ្នាមិនបានយូរ
- 2018-01-15 05:12:04
- ចំនួនមតិ 0 | ចំនួនចែករំលែក 0
ស្រឡាញ់គ្នាស្ទើរលេបក៏ដោយ បើមនុស្សមិនល្អ ក៏គង់នៅជាមួយគ្នាមិនបានយូរ
សូមជ្រើសរើសមនុស្សដែលមាន សីលធម៌ មកធ្វើជាគូជីវិត។
នៅពេលជ្រើសរើសដៃគូជីវិត យើងមិនគួរប្រញាប់ប្រញាល់នោះឡើយ។ ឃើញមុខមាត់ ដំណើរទំនងត្រូវចិត្ត ក៏កុំអាលទាន់សម្រេចចិត្តរើសគេធ្វើជាគូជីវិត គួរចំណាយពេលមើលចិត្តគ្នា ឲ្យយល់ពីចរិតពិតសិន កុំស្គាល់ត្រឹមតែសម្បកក្រៅ។
ត្រូវស្វែងយល់ឲ្យបានស្គាល់ពីចរិតពិត សន្ដានពិតរបស់គេថាតើពិតជាល្អ ឬយ៉ាងណា មានសីល ៥ក្នុងខ្លួនដែរឬ ក៏អត់។ បើមានគឺអាចចាត់ទុកថាគេជាមនុស្សល្អ គួររស់នៅជាមួយគ្នាបាន។
ប្រសិនបើឲ្យជ្រើសរើសរវាងមនុស្សដែលមានទ្រព្យស្ដុកស្ដម្ភតែគ្មានសីលធម៌ ជាមួយមនុស្សដែលមានសីលធម៌ប៉ុន្តែគ្មានទ្រព្យស្ដុកស្ដម្ភ សូមជ្រើសរើសអ្នកដែលមានសីលធម៌ប្រសើរជាង នោះយើងនឹងមិនខកចិត្ត មិនខូចចិត្ត។ បើជ្រើសរើសមនុស្សដែលមានទ្រព្យ ប៉ុន្តែគ្មានសីលធម៌ នៅថ្ងៃណាមួយ គេអាចបោះបង់យើងចោល ហើយទៅមានថ្មីក៏ថាបាន ព្រោះគេមានមាសប្រាក់ គេត្រូវការរកថ្មីពេលណាក៏បាន។
ដើម្បីជ្រើសរើសបានមនុស្សល្អ យើងក៏ត្រូវមានភាពវៃឆ្លាត និងចេះបែងចែកថាមនុស្សល្អយ៉ាងម៉េច មនុស្សមិនល្អនោះយ៉ាងម៉េច ទើបយើងអាចបានមនុស្សល្អនោះមកធ្វើជាគូជីវិត ឬមិត្តភ័ក្ដិ ដែលធ្វើឲ្យជីវិតរបស់យើងមានក្ដីសុខ ព្រោះមនុស្សល្អនឹងមិនបង្កទុក្ខលំបាកឲ្យអ្នកណាឡើយ។
បើបានមនុស្សមិនល្អធ្វើជាមិត្ត ឬគូជីវិត យើងនឹងមានភាពឈឺចាប់ គ្រាំចិត្ត ជារៀងរហូត ព្រោះមនុស្សមិនល្អនឹងមិនខ្វល់ខ្វាយពីអារម្មណ៍អ្នកដទៃ នឹងជាមនុស្សអាត្មានិយម ចង់ធ្វើអ្វីក៏ធ្វើ ដោយមិនចាប់អារម្មណ៍ថាខ្លួនឯងបានបង្កើតភាពក្ដៅក្រហាយទាំងកាយទាំងចិត្តឲ្យអ្នកដទៃឬក៏អត់ឡើយ។
ប៉ុន្តែមនុស្សដែលមានសីលធម៌ នឹងគិតគូរជានិច្ចថា ទង្វើរបស់គេទាំងកាយ វាចា នឹងសាងភាពក្ដៅក្រហាយឲ្យអ្នកដទៃ ឬក៏អត់។ បើសាង គេនឹងមិនធ្វើ ព្រោះគេនឹងមិនបំផ្លាញដល់ជីវិតអ្នកដទៃ មិនដណ្ដើមទ្រព្យសម្បត្តិអ្នកដទៃ មិនលូកលាន់ប្ដីប្រពន្ធអ្នកដទៃ មិនកុហកបោកប្រាស់ និងមិនឆ្កួតដោយសារគ្រឿងស្រវឹង គ្រឿងញៀននានា... ដូច្នេះហើយទើបមនុស្សល្អ គឺជាមនុស្សដែលអ្នកដទៃចង់ស្រឡាញ់រាប់អាន ព្រោះធ្វើឲ្យគ្រប់គ្នាមានក្ដីសុខផ្លូវចិត្ត និងអារម្មណ៍សុវត្ថិភាព ៕