កុំបាក់ទឹកចិត្ត! ត្រូវគេបណ្ដេញចេញពីការងារអាចជាបទពិសោធន៍ដ៏ល្អក្នុងជីវិត ព្រោះហេតុផល៣យ៉ាង
- 2018-01-13 02:51:17
- ចំនួនមតិ 0 | ចំនួនចែករំលែក 0
កុំបាក់ទឹកចិត្ត! ត្រូវគេបណ្ដេញចេញពីការងារអាចជាបទពិសោធន៍ដ៏ល្អក្នុងជីវិត ព្រោះហេតុផល៣យ៉ាង
សម្រាប់មនុស្សទូទៅ ការដែលត្រូវគេបណ្ដេញចេញពីការងារប្រហែលជារឿងដ៏អាក្រក់បំផុតនៅក្នុងជីវិតការងារហើយ។ ប៉ុន្តែអ្វីក៏ដោយ វាតែងតែមានគុណសម្បត្តិ និងគុណវិបត្តិរៀងៗខ្លួន។ នៅពេលដែលក្រុមហ៊ុនលែងត្រូវការអ្នក បញ្ជាក់ថាអ្នកគឺជាបុគ្គលិកអស់តម្លៃ គ្មានសមត្ថភាពគ្រប់គ្រាន់សម្រាប់មុខតំណែងនោះ ប៉ុន្តែសូមកុំបាក់ទឹកចិត្តខ្លាំងពេក ព្រោះហេតុផល៣យ៉ាងខាងក្រោម នឹងធ្វើឲ្យអ្នកភ្ញាក់អារម្មណ៍ចំពោះមេរៀនល្អៗមួយចំនួនដែលអ្នកទទួលបានពីបរាជ័យមួយនេះ៖
១. ជួយពង្រឹងស្មារតីអ្នកឲ្យរឹងមាំជាងមុន
ការប្ដេជ្ញាយ៉ាងមានទំនុកចិត្ត នៅថ្ងៃដែលអ្នកកាន់ដំណែងថ្មី ត្រូវបានថមថយបន្តិចម្ដងៗ ដោយសារតែមិត្តរួមក្រុមមិនផ្ដល់ការសហការគ្រប់គ្រាន់។ អារម្មណ៍បាក់ទឹកចិត្ត លែងមានជំនឿលើខ្លួនឯង កើតឡើងដោយសារតែការពេបជ្រាយ តាមចាប់កំហុស និងការរិះគន់មិនឈប់ឈរពីអ្នកជុំវិញ។ ប៉ុន្តែក្រោយឆ្លងកាត់រឿងនេះ អ្នកនឹងក្លាយជាមនុស្សថ្មីដែលរឹងមាំជាងមុន។ អ្នកដឹងថាអ្នកមិនអាចផ្គាប់ចិត្តមនុស្សគ្រប់គ្នាបានទេ រឹតតែមិនអាចបំបិទសិទ្ធិពួកគេមិនឲ្យនិយាយបានទៀត។ ដូច្នេះការតាំងចិត្តថ្មីគឺអ្នកលែងបណ្ដោយឲ្យទស្សនៈរបស់អ្នកដទៃ មករារាំងគោលដៅអ្នកបានដូចពីមុនទៀតហើយ។
២. ចាប់ផ្ដើមស្មោះត្រង់ជាមួយខ្លួនឯង
អ្នករៀនទទួលស្គាល់ពីសមត្ថភាពមានកម្រិតរបស់ខ្លួន ចំពោះការងារនោះ។ បន្ថែមពីលើនេះទៀត អ្នកបានដឹងពីចំណុចខ្សោយខ្លួនឯងមួយចំនួនធំ ដែលអ្នកមិនធ្លាប់ដឹងពីមុនមក។ អ្នកចាប់ផ្ដើម ស្វែងរកដំណោះស្រាយ ដើម្បីលុបបំបាត់ ឬកែប្រែវាឲ្យក្លាយជាចំណុចខ្លាំងវិញ។ មួយវិញទៀត អ្នកប្រហែលជាយល់ច្បាស់ ពីអ្វីដែលខ្លួនត្រូវការ រវាងប្រាក់ខែច្រើន និងភាពរីករាយដែលការងារអាចផ្ដល់ឲ្យ តើមួយណាដែលអ្នកគួរតែជ្រើសរើសយកសម្រាប់ឱកាសក្រោយ។
៣. លែងខ្លាចហានិភ័យ
កាលពីមុន អ្នកប្រហែលជាមនុស្សដែលពូកែខ្លាច មិនសូវហ៊ានប្រថុយប្រថាន ប៉ុន្តែក្រោយពីជួបរឿងនេះហើយ អ្នកនឹងក្លាយជាមនុស្សថ្មីដែលក្លាហានជាងមុនឆ្ងាយ។ ទោះជាអ្នកបរាជ័យលើកនេះ ប៉ុន្តែអ្នកបានប្រឹងប្រែងអស់ពីសមត្ថភាព ដូច្នេះអ្នកក៏គ្មានអ្វីត្រូវស្ដាយក្រោយដែរ។ ការភ័យព្រួយបារម្ភលែងជាឧបសគ្គសម្រាប់អ្នកទៀតហើយ ដូច្នេះតទៅមុខទៀត មិនថាត្រូវជួបរឿងលំបាក ឬហានិភ័យខ្លាំងប៉ុណ្ណា ក៏អ្នកមិនរួញរានិងសាងស្នាដៃដើម្បីសម្រេចជោគជ័យដែលខ្លួនចង់បានដែរ ៕